الجزء الأول
في بيت أم سالم
نورة توها يايه من الدوام: السلام عليج أمايه
أم سالم: وعليكم السلام .. حيالله نواري .. شو الدوام اليوم ؟؟
نورة: الحمدالله زين.. امايه انا تعبانه بسير ارقد
أم سالم: انزين تغدي وخلاف سيري تغدي
نورة: لا ما اريد .. خلاف يوم بنش باكل
أم سالم: برايج امايه
وتسير نورة غرفتها.. نورة آخر بنات أم سالم وعمرها 23 سنه .. تخرجت من الكلية وعلى طول اشتغلت.. نورة ما كانت تفكر تعرس لانها ما كانت تتخيل انها فـ يوم من الايام بتبتعد عن امها.. هالموضوع اللي كان يضايج بامها .. لانها ودها تشوف بنتها عروس.
أم سالم تمت يالسه فـ الصاله تتريا باقي عيالها يردون من الدوامات.. بوسالم توفى قبل 5 سنوات ومن يومها صار ولده سالم ريال البيت .. سالم عمره (27 سنه) معرس ماخذ وحده من معارفهم وعنده بنت وحده اسمها شيخه وعمرها سنتين.. وساكن ويا اهله في نفس البيت بس هو عنده ملحق روحه.
أحمد آخر العنقود .. عمره 19 سنه .. يدرس في كلية التقنيا .. دلوع البيت اللي ما ينرد له طلب .. وهو اقرب انسان لنوره .. لانه نوره ما عندها غير أخت وحده ومعرسه من زمان ماخذنها واحد من العين.. فـ ما يشفونها الا بين فترات طويله.
بيت أم عمر
الكل متيمع ع الغدا .. هالوقت الوحيد اللي العايله تكون مجتمعه فيه .. لانه العشا كل حد ياكل في وقت.
بوعمر ريال عود فـ العمر .. وعنده 3 أولاد .. عمر (26 سنه) أكبر عيالهم لين الحينه مب معرس .. رافض فكرة الزواج .. أول ما تخرج مسك حلالهم .. ومن يومها وهو كله مشغول.
سعيد (23 سنه) توه مخلص دراسه واشتغل في شركة ابوه.. سعيد يعرف نوره من 4 سنوات .. بينهم قصة حب غريبه.. وسعيد كان واعدنها انه يخطبها .. بس يتريا أخوه العود يعرس أول.. لانه اهله ما بيرضون..
راشد (19 سنه) يدرس ويا أحمد في الكليه .. وهم ربع من أيام المدرسه .. وهم كانوا سبب فـ علاقة نوره بـ سعيد.
عمر وهو يرمس أبوه: أبويه انا اشوف لو تسافر وتسوي فحص كامل أخير لك من أنك كل يوم وثاني اتشكى وتاخذ ادوية بكيفك
بوعمر: لا ما يحتاي .. انا بخير ما فيه شيء
راشد: ابويه صدقه عمر .. شو رايك نسافر ؟!
ام عمر وهي تكلم راشد: عاد انته موتك وحياتك انك تسافر
عمر: راشد ما بيسافر .. عنده كليه .. سعيد بيوديكم
سعيد كان سرحان من سمع اسمه انتبه: خير
عمر: قلت لو انته تسافر ويا ابويه
سعيد: ليش .. وين يبى يسافر ؟
عمر: لااااااا... اشهد انك مب ويانا .. سعيد نحنا من الصبح يالسين نرمس انه ابويه تعبان ويحتاي يسافر يسوي له فحوصات .. وانا قلت انك انته توديه لانه راشد عنده كليه
سعيد وهو منحرج لانه الكل يطالعه: خلاص .. انشاء الله بوديه
ام عمر: وانا بسير وياكم
سعيد: ماله داعي امايه .. بتتعبين ويانا
ام عمر: لا ما بتعب .. ما تسيرون بدوني .. انا ما اصبر عن ريلي
عمر: خلاص انشاء الله .. اليوم انا برتب لكم السفر
ونشوا كلهم من ع الغدا .. وكل واحد فيهم سار حجرته يرتاح .. راشد كان مغيض انه ما بيقدر يسافر والسبه الكليه .. اما عمر كان مستغرب من حال سعيد اخوه .. وايد شاغل باله هالفتره .. بس يعرف انه سعيد من النوع اللي ما بيرمس .. حتى لو سار وحاول انه يسحب الرمسه منه.
سعيد كان غرقان في بحر من الهم .. مب عارف شو يسوي في موضوع نوره .. نوره كل يوم والثاني تنخطب وهو ما يقدر يسوي شيء .. وخايف انه ايي يوم واهلها يغصبونها انها تعرس.
العصر في بيت ام سالم
نورة من الملل مب عارفه شو تسوي .. سارت ويلست في الحديقه .. تحاول توصل لحل لموضوع سعيد .. هي تحبه .. مب بس تحبه تموت فيه .. ما اتخيل انها تعيش حياتها بدون سعيد.. بس فـ نفس الوقت ما تقدر اتم ترفض .. اهلها كم بيسكتون عنها .. وبالذات اللي خاطبنها الحينه .. مب عارفه شو تسوي في السالفه وكيف تتصرف
شوية وتسمع صوت سيارة داخله حوي بيتهم
كانت سيارة ولد عمها سيف .. سيف عمره ( 25 سنه) وهو وايد ويا سالم ويشتغل وياه في نفس المكان .. سيف بعده ما عرس .. كل ما كانوا يخطبون له وحده يطلع فيها مليون عله .. حتى اهله تعبوا وهو يخطبون له .. لين ما آخر شيء امه قالت له روحك اختار.
سيف نزل من السياره وشاف نوره يالسه في الحديقه .. قرب منها
سيف: السلام عليج
نوره: وعليك السلام .. هلا سيف شحالج ؟؟
سيف: ربي يعافيج .. الحمدالله بخير .. شحالج انتي ؟؟
نوره: الحمدالله زينه
سيف: شو أخبار الدوام .. انشاء الله مرتاحه ؟؟
نوره: الحمدالله اوكيه .. لين الحينه مرتاحه
سيف: الله يوفقج انشاء الله .. الا بتخبرج ما عندكم بنات غاويات في الدوام ؟؟
نوره وهي تضحك: سواف يوز عن سوالفك .. مليون مره قلتلك انا ما بخطب لك .. انته مستحيل تقتنع بـ بنت.
سيف: انزين حرام عليج .. يهون عليج يعني ولد عمج لين الحينه مب معرس .. ما تغمضج امايه لين الحينه ما شافت عيال ولدها الوحيد
نوره: والله عاد هاي مشكلتك .. سير تعالج اول وخلاف تعال قوللنا نخطب لك
سيف: انزين نواري عندي اقتراح
نوره: الله يستر .. قول
سيف: شو رايج اخطبج انتي ؟!
نوره وهي مببقه عيونها: نعــــــــم
سيف وهو يضحك ع شكلها: صدق .. بنت غاويه ومتعلمه وعاقل .. وبنت عمي ..وين بلقى احسن من جي
نوره وهي بعدها منصدمه: سيف انته شو يالس تخربط .. انته تعرف اني اعدك شرات اخويه سالم
سالم وهو ياي من بعيد ويقاطعهم: مرحبا الشيوخ
سيف يصد صوب سالم: مرحبتين .. وينك يا ريال ساعه لين ما تطلع .. والا كنت تتريا تاخذ الاذن
سالم وهو يكفخ سيف ع جتفه: عيب عليك هالرمسه .. انا ريال والرياييل ما ياخذون الاذن من حد
سيف: انزين يالله نسير .. اقول نواري فكري في الموضوع
نوره:..............
سالم وهو يطالعهم: اي موضوع .. شو عندكم ؟؟
سيف وهو يبتسم بخبث: ما شيء .. اسرار
سالم: ايه انته .. شو من الاسرار بينك وبين اختي
سيف وهو يضحك: اسولف وياك ما شيء اسرار .. يوم شفتك تحيرت نزلت من السياره شفت نوره يالسه روحها قلت بسير بغلس بها شويه .. قلتلها شو رايج اخطبج وعاد هي انصدمت وصدقت السالفه.
نوره وهي معصبه: صدق ما تستحي .. حرام عليك طيحت قلبي .. على بالي ترمس جد
سالم: وشو فيها لو كان يرمس جد .. والا انتي اتحرين انج طول عمرج بتمين في بيت هلج
سيف: اقول سالم يالله نسير .. انتوا هاي السالفه ما بتخلصون منها
نوره تمت مضايجه عقب ما راحوا عنها .. لانها تدري انه سالم مضايج من رفضها المتكرر .. بس هي شو بيدها .. هي اسيرة لعواطفها و قلبها.
بيت أم حمد
عايلة حمد .. مكونه من ولد واحد و3 بنات .. حمد وعمره 35 سنه ماخذ بنت خالته وعنده ولدين وبنت.
ميثا (27 سنه) معرسه وعندها ولد واحد .. ماخذنها ولد ربيعة امها ويقربلهم من بعيد.
عاشه(23 سنه) ربيعة نورة روح بالروح .. وتشتغل وياها في نفس المكان .. هم ربع من يوم ما كانوا صغار .. ودرسوا ويا بعض .. واشتغلوا ويا بعض .. وكل طلعاتهمو ويا بعض.
الريم (17 سنه) آخر سنه في المدرسه .. وهي اصغر البنات
عاشه: ريمو قومي عني .. صدعتيني بسوالف المدرسه .. ومعجباتج
ريم: انزين اصبري .. آخر سالفه
عاشه: اقولج سيري بالزين لا اييج شيء
ريم: اففففففففف شو هالاخ .. محد يروم يسولف وياج .. لو نوره جان يلستي تسمعين سوالفها ليل ونهار
عاشه وهي تضحك: نوره غير وانتي غير
ريم: الحينه تبدين نوره عليه ؟!
عاشه: انا ما ابيدها عليج .. بس يا حبيبتي .. انا ونوره ويا ويا بعض .. وتكفيرنا نفس الشيء.. انتي بعدج ياهل
ريم وهي ماده بوزها: كل تقولون لين ياهل .. ما ادري متى بكبر في عينكم
ام حمد وهي داخله الصاله: بتمين ياهل في عينا لو استويتي عيوز
ريم تنش وتسير تلوي على امها: ماماتي حبيبتي تولهت عليج
ام حمد: قومي عيني ياللوتيه .. ما اتين الا اذا عندج شيء
ريم: حرام عليج والله بس تولهت عليج
ام حمد وهي ترمس عاشه: عويش اختج ميثا ما اتصلتبج ؟!
عاشه: لا .. ليش ؟
ام حمد: لا ما شيء بس اتخبر
عاشه: ما ادريبها
وتسير ام حمد وتيلس عند تلفون الصاله وتتصل بميثا تطمن عليها.. وشويه ويرن تلفون عاشه
عاشه: الو
نوره: هلا عواشي
عاشه: اهلين نواري .. شحالج حبيبتي ؟؟
نوره بضيج: الحمدالله
عاشه: شو فيج .. حسج مب عايبني
نوره: ما شيء .. سالم وسوالفه اللي ما تخلص
عاشه فهمت السالفه: نوره لا تلومينه .. انتي رفضج مب مقنع
نوره: اقولج انا متصل اسولف وياج لا تضيجين بي زياده
عاشه: ع راحتج .. المهم خبريني شو مخططاتج ؟!
نوره: ماشيء .. ليش ؟
عاشه: شو رايج نظهر شويه
نوره: وين انسير ؟؟
عاشه: بس بنتمشى بالسياره وبنرد
نوره: ما ادري .. بشاور امايه
عاشه: خلاص عيل شاوريها وردي عليه خبر
نوره: اوكي حبيبتي .. يالله باي
عاشه: باي
تسير نوره وتشاور امها وتقولها برايها تسير بس ما تتحير عشان ما يعصب سالم
نوره تزخ تلفونها وتتصل ب سعيد .. بس تم يرن ومحد رد عليها .. كتبت لها مسج انها بتظهر ويا عاشه.
وسارت وتلبست وهي يايه بتظهر من الحجره يرن تلفونها .. وترد عليه
نوره: الو
سعيد: هلا حبيبتي
نوره: اهلين .. وين كنت ؟؟
سعيد: اسمحيلي كنت راقد
نوره: امممممم .. انزين وصلك المسج
سيعد: هيه.. وين بتسيرين ؟
نوره: ما ادري بس بنتمشى .. ابغي اغير جو
سعيد: حد مضايج بج ؟
نوره: لا .. ليش ؟
سعيد: نواري انا اعرفج عدل .. انتي ما تظهرين بس جي الا اذا حد مضايج بج
نوره: لا ما فيه شيء .. بس ملانه
سعيد: خلاص برايج حبيبتي بس لا تتحيرين .. بتوله عليج
نوره: انشاء الله .. مع السلامه
سعيد: مع السلامه
تسكر عنه نوره وتظهر من البيت لانه ربيعتها تترياها برع .. اما سعيد يتم يفكر في نوره .. من فتره وهي متغيره عليه ما ترمسه شرات اول .. يحس بجفا من صوبها .. صابر عليها لانه يدريبها اهلها واايد ضاغطين عليها بسالفه العرس.
