Wednesday, June 15, 2005

موعد المستشفى




اليوم الجو كان وايد غريب .. من الصبح وينزل مطر عندنا .. ومن سوء حظنا أنه عندنا موعد الساعة 8 الصبح
معناته يا أنه نأجل الموعد .. وإلا نخترس في المطر عشان نحصل تاكسي
بس الحمدالله ع حظنا وحده كانت نازلة من التاكسي عند سكنا وخذنا التاكسي
طبعا ما بنوصل ع الوقت .. لأنه هالبلاد هالوقت زحمتها هب طبيعية .. طبعا مستحيل تكون شرات زحمة دبي .. بس اللي يعيش أهنه فتره طويلة يتعود على أنه الشوارع تكون فاضيه

بس أيام الويك أند وساعات الدوامات زحمة
والدكتور حظرته يباني كل يوم أني الساعه 8 الصبح


وصلنا متأخرين .. المستشفى له بوابتين .. نحنا دخلنا من البوابة الثانيه اللي تكون فـ البيسمنت 1 والعيادة اللي نحنا نبى نيسرلها فـ البيسمنت 2
بس أنا من العيلة نسيت وتميت أمشي فـ البيسمنت 2 أدور العيادة .. عقب ما طفوت 5 دقايق أدور وأمايه الفقيره تمشي ورايه .. أكتشفت أني في الطابق الغلط

خلاف رمست الدكتور وقلتله غير الموعد .. وايد صعب نوصل فـ هالوقت .. وهذا غير سالفة المطر اللي انا ما توقعته .. من جذه اليوم وايد تأخرنا
الحمدالله أنه كان متفهم وقالي خلاص بغيره لكم .. زين يوم حد رأف بـ حالي

بس المشكله أنه هالوقت كان مناسبني .. لأني كنت حاطه في بالي ما برقد طول الليل وبوديها الصبح وخلاف برد وبرقد .. بس الحينه إذا غير لي الموعد معناته لازم أرقد من وقت عشان أنش الصبح وأوديها
أذكر مره من المرات من الخبال اللي فيه ومن كثر الرقاد اللي أحسبه .. ما كنت قادرة أنش الصبح .. طبعا لأني راقده وقت متأخر .. أكلم عمري " يعني ما يستوي حد يوديها غيري .. ليش دايما أنا .. ما يستوي يعطوني يوم راحة .. بس اليوم أريد أرقد "

صدق يوم نشيت أكتشفت أني خبلة .. يعني منو بيوديها غيري .. بس عادي مرات الأنسان يتمنى أنه حد يشل عنه جزء من المسؤوليه اللي ع راسه .. فـ من حقه ع الأقل أنه يحلم


هاي بعض الصور اللي صورتها اليوم






روحه الشارع زحمه الصبح .. عاد يوم يطيح مطر تزيد الزحمه



من كثر الماي .. من تمر سيارة حذالنا ينطش الماي ع زجاج دريشتي .. مب ينطش مال دلع .. لا جنه حد يصب ماي ع السياره من فوق

مع أنه نظام البواليع عندهم وايد زين .. يعني عقب ما يوقف المطر مستحيل يكون الماي بعده في الشارع


10 comments:

qalm-jaf said...

ما تشوفين شر
بس فى كم كلمه ما فهمتها
صدق يوم نشت اكتشفت انى خبله
يعنى شنو؟؟؟
وبعدين المطر وين؟

malak_dubai said...

qalm-jaf

الشر ما أييك أخويه


اسمحلي كانت غلطة مطبعيه كلمة (نشت) المفروض كانت تكون (نشيت) .. وأنا صححتها الحينه


كنت أقصد .. يوم صحيت من النوم

والمطر فـ سنغافورة

Q8Lioness said...

ألف سلامه
انا من الكلام اللي فهمته انه العلاج للوالده
يارب تقوم بالسلامه
وهذا حال ديرهم ماشاء الله مطر مايوقف حتى في عز الصيف يابختهم

رحـّــال said...

والله اني اشتقت لزحمة دبي وحر دبي

بعد ما عشت ف بريطانيا ثمان سنين وشفت بردهم ومطرهم، قمت أكره شي اسمه البرد والأمطار

أحب حر دبي
:)

الله يشفي الوالدة، ما تشوف شر
وعساكم تردون دبي بأسرع وقت انشالله

qalm-jaf said...

صار معلوم
ما تشوف شر الوالده انا مجرب مرافقة المريض الله يعينك المريض تعبان والمرافق بعد تعبان
والله يسامحك على المطر والصور احنا فينا فقر مطر ومناظر طبيعيه حلوه
والله يشفى مرضاكم ومرضانا
آمين

malak_dubai said...

Q8Lioness

الله يسلمك أخويه

وبخصوص المطر .. صح المطر عندنا ع طول السنه .. بس والله ما تحس بنفس الفرحه يوم تشوف المطر في البلاد
مطر البلاد أحلى عن مطرهم بوااااايد



= = = = = = = =

رحال

والله صدقك .. حتى لو نشوف المطر والبرد

ما شيء أحلى عن دبي .. حتى في عز الصيف أحبها

كل حد يقولي ليش بتردين .. تمي هناك عن الحر .. أقولهم برايه لو حر المهم أرد بلادي


= = = = = = = = =

qalm-jaf

ترى لا يغرك المنظر والمطر .. صح وقت المطر الجو حلو .. بس الرطوبه عقب المطر تكون فظيعه

تدري .. مرات أقول لأمايه .. ترى مب أنتي الوحيدة المريضه .. أنا بعد مرضت

مب مرافقة المريض بس هي اللي تمرض .. سيرة المستشفى .. زياراتك للمرضى
هاي كلها أشياء تحسسك خلاص أنك مريض وأكثر عنهم بعد

~ se3loah ~ said...

ملاك انتي ساكنه هناك على طول؟

malak_dubai said...

norah

لا الغاليه انا هب ساكنه في سنغافوره على طول

بس تميت فيها 6 شهور ورديت البلاد حق شهرين والحينه من شهر وشيء تقريبا اهنه

وما ادري كم بعد بتم فيها .. الله يستر

~ se3loah ~ said...

يووه الله يرجعك بالسلامه انشاء الله
بس وسعي صدرك هناك خضار وامطار مهب مثلنا انواع الحر

malak_dubai said...

norah

الله يسلمج الغاليه

صح عندنا خضار وامطار بس والله مرات اتعب نفسيا من هالجو

خلاص ودي أرد للحر

مره وانا طالعه كانت الساعه حوالي 3 الظهر والجو مطر وهوا فظيع

فجأة تذكرت هالوقت كيف بيكون الجو عندنا

3 الظهر في عز الصيف .. حر مووووووت

بس والله اني تولــــهت ع الحر

لو انه بلادي حر .. بس والله ولهت عليها حيـــــل