Saturday, July 30, 2005

ضياع التلفون وقفل البطاقة



اليوم بالنسبه لي يوم الأحداث العالمي .. أول مره أحس بجيمة التلفون بالنسبه لي
ما جد اهتميت وايد بـ موبايلي .. وعادي عندي لو ما يكون موجود قريب مني

اليوم كنت يالسه ويا صغاريه عندنا في السكن وطلبوا مني شيء .. قلتلهم اوكيه يالله بنروح
شقتنا وبسويه لكم .. وكانت فـ يدي خريطه لهم .. وحطيت موبايلي فيها

المهم .. يلسوا ويايه الصغاريه وما قدرت اخلص شغلتهم وروحوا عني وقالوا بيطلعون ويا اهلهم
قلت مب مشكله وانا ناسيه سالفة التلفون

عقب مرور 4 ساعات بدأت عملية البحث عندي .. ادور على تلفوني وينه ما لقيته

اتصل من تلفون الشقه ع موبايلي بس ما اسمع شيء يرن

تذكرت الخريطه وسيدة اتصلت على الصغاريه وقالوا لي هيه الخريطه عندنا ما كنا نعرف انه فيها تلفونج

ويوم بنرد البيت المسا بنييبه لج

يعني عقب 3 ساعات .. عاد بدت عندي الشكوك توديني وتييبني

بـ صراحه ما أوثق فيهم .. وايد مشاغبين وكان عندي احساس انهم ممكن يتعبثون في التلفون

وتميت اتريا والوقت ابدا ما يمر .. وانا على اعصابي

لين ما سمعت صوت الجرس وركضت افتح الباب

المهم .. اخيرا رد لي تلفوني .. بس غريبه انا كنت متصله .. يعني المفروض شيء مكالمه لم ير عليها

بس ما شيء .. معناته هم تعبثوا بالتلفون .. وصدق غيضت

فـ قالت لي وحده من البنات شو رايج نحط لج اللوك على اساس مره ثانيه لا قدر الله اذا ضاع
محد يقدر يسوي شيء بتلفونج

قلتلها اوكيه .. بس مب تقفلين لي البطاقه ما فيه
قالت لا ما يخصه ما بتنقفل البطاقه

وتمينا نجرب لين ما انقفلت البطاقه

بطاقة سنغافوره .. شو يفجها الحينه .. ما شيء PUK code على البطاقه الاساسيه

وتميت افكر وافكر .. آخر شيء استسلمت للامر الواقع وقلت خلاص بشغل اي رقم ثاني



بس تميت على اعصابي .. كم شخص لازم اطرش له واقوله اني غيرت رقمي

المستشفى .. السفاره .. الاهل في البلاد .. ربيعاتي

ما تسوى ابدا السالفه عليه

قلت ليش ما اتصل الاستعلامات عندهم وأسأل شو الحل .. نحنا عندنا في الامارات

اذا انقفلت البطاقه وما عندك البطاقه الاساسيه اللي مكتوبه عليها الارقام خلاص لازم نطلع بدل فاقد .. قلت بجرب بشوف شو بيقولون لي اهنه

ترييت طبعا وايد لانه الساعه 1 فليل .. زين يوم حد يداوم بعد هالحزه

آخر شيء ردت عليه وحده .. قلتلها المشكله قالت اوكيه طلعي البطاقه من تلفونج
وعطيني الرقم اللي مكتوب ع ظهرها



وعطيتها .. وجان تعطيني PUK code وانفتحت البطاقه

من وناستي تميت اشكرها ... كان خاطري اقولها نحنا في البلاد ما عندنا هالخدمه


بس صدق صدق ارتحت نفسيا .. لانه تعب اني اغير رقمي عقب ما استخدمه لمدة تقارب السنه


بس يا ترى لو كان صاير لي هالموقف في الامارات .. شو كنت بسوي ؟؟

الأكيد أني بموت حسرة على بطاقتي ولازم اسير اطلع بدل فاقد


بس يقولون بو طبيع ما ايوز عن طبعه .. رديت الا اجرب كيف اقفل التلفون

وآخر شيء عرفت .. وكانت الطريقه ما شيء اسهل عنها .. وما يحتاي انه نستخدم الـ PIN code



11 comments:

qalm-jaf said...

زين الحمدالله لقيتى التلفون بس اللقافه مو زينه لا تعبثين مره ثانيه فى البطاقه والله انا نفسك ما اعرف شى فى سوالف الموباليل غير انى ادق وادز رسايل
(:
صج الواحد فينا ما يحس بقيمت الشى الا اذا فقده
بس والله اول مره ادرى ان فى الامارات اذا قفلت البطاقه لزم تغير البطاقه عندنا غير نفس اللى سويته اندق على الشركه بعد ماتتاكد ان فعلا هذا اهو صاحب البطاقه
(:
خطه شريره
راح ادق على الشركه فى سنغافوره واعطيهم رقم البطاقه واقولهم كنسلو الخط اى البطاقه مالت الموبايل اللى انتى حاطه رقمها وقولهم ما ابيه
ههههههههههه
تتوقعين اسويها
(:

malak_dubai said...

qalm-jaf

هههههههههههههههههه .. بـ صراحه ما اتخيل هالحركه منك .. واستبعدها عنك

بس يقولون لك انا هب مينونه عشان صدق احط في البلوق ارقام بطايق صدقيه

والله ما ادري منو يحبني ومنو يكرهني

ما فيه صدق يسوونها

لو انه هالبطايق اللي انا حاطه صورهم ما استخدمهم اللهم محلوتنهم على رقمي

بس بعد مستحيل احط ارقام حقيقيه

افتح الصوره في براوزر روحه ودقق فيها

بتلقى اني ماسحه رقم من كل بطاقه - - - - - >> مب هينه البنت


سررت بتواجدك .. و ودر عنك الشطانه:P

~ se3loah ~ said...

يالله الف مبروك
بس ترا بعض الاحيان اللقافه تموت

انا اكره شي اذا شفت احد يلعب بجوالي خاصتا اذا ضاع والا صار بيد احد
يعني مالكم دخل ليش اللقافه؟؟

زين ما دوقوا فيه مكالمات دوليه وانتي اللي تتوهقين

والله يازين هالخدمه ليش ما عندنا مثلها

qalm-jaf said...

ملاك دبى
الصوره صارت ماتطلع كامله
شنو سويتى فيها والله منتى هينه
(:
اما بالنسبه من اللى يكرهك والله ما اعرفه
بس اكيد اللى يحبونك وايد
(:
تحياتى مع ابتسامه لكى اختى ملاك

adil said...

وش هالخدمة الغريبة؟؟

عيل ليش في بلادنا لازم تدفع فلوس من اجل فتح الخط من جديد


يعني لازم نظل متخلفين

malak_dubai said...

norah

الله يبارك فيج الغاليه

صدقج والله اكره شيء انه حد يتعبث بتلفونج
انا ما احب انه حد يدقه .. وين عيل لو يضيع وحد يتعبث فيه
صدق عشت ساعات كله احاتي فيها
طول الوقت كنت احاول اتذكر انا شو مخزنه



= = = = = = = = =

qalm jaf

ما سويت شيء بالصوره .. حرام عليك تظلمني
بس حتى لو طلعت الارقام مب كامله فيها

واتمنى فعلا انه الناس اللي تحبني اكثر
اضايج لما اعرف انه حد يكرهني .. احاول اني اعدل صورتي عند
هالشخص .. بس مرات افشل
وصدق وايد اعاني من هالسالفه


= = = = = = = = =

adil

الخدمه مب غريبه .. والمفروض انها تكون موجوده عندنا كلنا
بس نحنا عندنا في الامارات عشان تجنب انك تسير اطلع بطاقه ثانيه وتدفع
لازم تيود البطاقه الاصليه الكبيره ويكون مكتوب عليها الـ PUK cade

بس طبعا نحنا في الامارات من نطلع البطاقه الصغيره من الكبيره
نفر الكبيره لانه ما بنستخدمها

انشاء الله بس يطلعون نفس الخدمه اللي في سنغافوره

@z3nF said...

ماشاء الله عليهم صحيح اذا قالوا دوله متقدمه
ليتنا تقدم بالاشياء المفيده بدل قلة الادب
المهم قرة عينك بجوالك
و ثاني مره علقيه في رقبتك احسن
ههههههه

عريشي said...

وي وي شو صاير عندك

كل ها في يوم وااحد

لاتقولين لي يوم السبت هههه

يالله اهم شي السلامة

وبعدين هالله هاللله في نفسكم في الخارج

صج الغربة جايدة بس هاي الحياة

وصدق الخدمة هاي حلوة ماشالله

حنى مافيه الله يعننا نروح نطلع غيرها

هيا في امان الله

~ se3loah ~ said...

وينك يا ملاك دبي
وين بوستك الجديد

malak_dubai said...

عريشي

شفت عاد حظي .. كله فـ يوم واحد

اظني هذا درس عشان اتعلم اني احافظ على تلفوني


تسلم ع المرور .. ومشكور ع التوصيه



= = = = = = = = = =

norah

بخليج ويا بوستي اليديد :)

وتسلمين ع السؤال

Anonymous said...

مساء الخير…أنزلت إدراج جديد وإنشاء الله يعجبكم أنت وكل الأصدقاء المدونين ….