Monday, January 23, 2006

أول يوم في الونتر + عريس الغفلة



يوم السبت .. أول يوم دراسي في فصل الونتر

كنت وايد مضايجه قبله بيوم .. مجرد احساس اني بداوم كل يوم .. كان يلوع لي بجبدي

عندي ماده وحده .. تبدا من 7 وتخلص 10 بالليل

وصلت الكليه وانا احاول اتقبل واقع اني خلاص بدا دوامي .. وخلصت الاجازه

في وقت البريك .. سرت عند دكتوره كانت تدرسني الكورس اللي طاف

دخلت عليها مكتبها

انا: السلام عليج دكتوره

الدكتوره: وعليكم السلام .. هلا ملاك حياج تفضلي

انا: شخبارج دكتوره

الدكتوره: الحمدالله بخير .. تعالي ملاك .. ابغي ارمسج في موضوع

انا: خير دكتوره .. عسى ما شر

الدكتوره: لا ما في شيء .. بس فلان يبى يخطبج .. واهله رمسوني يسالوني عنج .. انا قلت اللي شفته فيج

طبعا اكيد الدكتوره طاحت فيه مديح .. لانها وايد تحبني .. بس هذا من وين طلع لي بعد ما ادري .. قبل كمن شهر صار موقف بيني وبين هالانسان .. وصدق وايد غيضت عليه .. هذا اللي يشوفه يقول مستحيل يفكر في العرس

بـ اختصار .. بالنسبه لي كانت صدمه انه خطبني .. معقوله لهالدرجه انا أثرت فيه وخليته يفكر في الزواج

بحكم ما كنت سامعتنه عنه قبل فـ هالانسان ما يصلح لي ابدا

قلت للدكتوره: دكتوره انتي تعرفين رايي في هالانسان .. بليز انهي الموضوع من الحينه

الدكتوره: هيه بس يمكن تغير الحينه .. الريال يباج .. واهله واااايد متمسكين فيج .. بس يتريون تقولين هيه وسيده بيون يخطبونج رسمي

انا: دكتوره .. انا رافضه .. واهلي ما اظني يرضون

الدكتوره: لا تستعيلين وردي فكري عدل .. ورمسي اهلج

انا: انشاء الله يصير خير

وطلعت من عندها ورديت كلاسي .. مستحيل كنت اقدر اركز .. من وين طلع لي هذا الحينه .. وقته يعني


في قرارة نفسي انا رافضه .. بس ليش افكر في السالفه ما ادري .. شو الشيء اللي يخليني افكر

ما انكر انه كبر في عيني يوم انه قرر يخطبني بدال لا يلعب عليه .. وبالذات انسان شراته مستحيل يفكر في الزواج .. معقوله قدرت اغير رايه

ما ادري هذا حب من اول نظره او مجرد اعجاب

فكرت وفكرت وااااااااايد .. حتى ما اظلم هالانسان .. ما ادري بصراحه في شو كنت افكر .. بس كل اللي كنت اسويه اني اربط الاحداث من اول يوم رمسني في الكلاس لين اليوم

كنت احس من نظراته مرات بـ اعجاب .. بس معقوله يوصل للارتباط

لا.. لا مستحيل

اليوم بعد ما خذت نفس عميييييييق .. رمست اختي العوده .. وطبعا قبل لا اسمع رايها .. قلتلها اسمعي تراني رافضه

بس حبيت اقولكم .. عشان اذا وصلت لكم الرمسه من برع ما تنصدمون .. وانا باجر برد على الدكتوره وبقولها اني رافضه والموضوع منتهي بالنسبه لي


انا رفضت خلاص .. والموضوع منتهي

بس ما ادري ليش .. بعدني احس بتأنيب الضمير

هل فعلا انا يالسه اظلمه بهالقرار

I really don’t know what to do... it’s really hard to me to handle this all


But I know what I’m gona to do it.. is the right

Is it right??


ادري اني واااااااايد رمست .. بس كنت اريد اطلع اللي في خاطري .. بس بعدني احس بضيااااااااع كبير

اتمنى من كل قلبي انه رفضي له يكون آخر المطاف بيني وبينه

واتمنى فعلا انه ما يتمسك فيه اكثر .. لاني ما بعرف شو اسوي عقبه

14 comments:

Q8ya said...

اهم شيء احساسج تجاهه ...^___*

واذا مو متأكدة استخيري والله العظيم ترتاحين واان مجربه الاستخارة في اكثر من شيء وفعلا تستريحين...^___*


واحساسج بتأنيب الضمير عادي وما اعتبره تأنيب ضمير ....


وليش انتي تفكيرين فيه وايد ....شيء عادي حبيبتي اعتبريها فترة وبتنسين .... شيء طبيعي الوحده لما تفكر واايد وبشكل مو طبيعي لما تسمع خبر خطبه لها ....وخصوصا البنات...^___*


فانا اقولج استخيري...:)


موفقه عصفورتي...^___*

malak_dubai said...

الموضوع منتهي خلاص

انا رديت عليهم خبر اليوم .. ورفضت الولد

صح وايد كنت متردده .. مب لاني ابغيه .. بس كنت خايفه على مشاعره

الانسان ما يناسبني .. لا على مستوى اجتماعي .. ولا على مستوى ثقافي

انا ما اتخيل اني اعيش وياه العمر كله


بس كنت وايد خايفه عليه .. يمكن انه ينصدم من ردي

المفروض هو يتوقع رفضي له .. بس رغم هذا خطبني

انشاء الله بس الخبر ما يأثر فيه وايد



مشكوره حبيبتي على كلامج .. وادري الاستخاره زينه .. بس الواحد يستخير يوم يكون متردد .. انا كنت رافضتنه .. واسبابي قويه

بس شعوري بالذنب هو اللي كان معذبني

Q8ya said...

اهم شيء انج مرتاحه ^___*

وليش تخافين على مشاعره دامج مو مسوية شيء غلط...!!

بطلي هالعادة


;pPp

qalm-jaf said...

فى بداية الامر الرجل جزاه الله خير ان يفكر فى الزواج ودخل من الباب
.
.
.
ملاك دبي فى اعتقدى من اصعب الاشياء عندى اتخاذ القرار ؟؟؟
.
.
يعنى الله يعينك صعب جدا ان يتخذ الشخص قرار مثل هذا
.
.
.
ولكن الاصعب الى متى الانتظار؟؟؟
.
.
واذا ذهب هذا الشخص واتى شخص آخر هل ستفكر ايضا بالرفض؟؟
اى اسباب الرفض للدراسه او بسبب شخصه؟؟
.
.

هل الرفض لسبب الرفض ام للخوف من القرار الصعب ؟؟
.
.
.
هل لو تقدم لك رسمى وجاءت الوالد واخبرتك او ارمست لك وليس الدكتوره
ماذا سيكون الرد؟؟؟
.
.
.
اختى ملاك القرار صعب جدا؟؟
والله يعينك ويكتب اللى فيه الخير
.
.
.
مبروك فى الحالتين
(:

malak_dubai said...

q8ya

تصدقين .. ما ادري متى بودر اني اسوي حساب لـ مشاعر الغير قبل مشاعري

بس يالله الحمدالله .. كل شيء لين الحينه تماااام


= = = = = = = = =

قلم جاف

صدقني حتى انا من اصعب الاشياء في حياتي اتخاذ القرار

بس هاي اول مره اتخذ قرار وانا حاسه اني ما غلطت فيه

يمكن قراراتي في اشياء تخص ماضيه وايد مأثره فيه لين الحينه

من جذه صار اتخاذ القرار امر وايد صعب بالنسبه لي


تسألني إلى متى الانتظار ؟!

صدقني روحي ما اعرف .. ما ادري ليش اخاف من هالموضوع

الزواج مب رحله بسيرلها يومين وبرد بيت اهلي

الزواج مشروع كبير .. يا انجح فيه او اخسر صفقة عمر

وبعدين انا بعدني صغيره توني الا 20 سنه.. جدامي عمر

بس سؤال وجيه .. هل اني برفض الياي او لا

امايه سالتني نفس السؤال .. ما عرفت ارد عليها

قلتلها لكل حادثه حديث


اما بخصوص اللي خطبني .. فعلا لو كان خاطبني بصوره رسميه اكثر

يمكن الموضوع كان بيختلف عندي .. يمكن طريقتهم كانت غلط


بس بعد .. موضوع الزواج مؤجل لفتره عندي


تعرفون شو اكثر شيء احاتيه .. كيف بيكون موقفي يوم بشوفه في الكليه

الحمدالله انه هو مب مسجل كورس ونتر

بس اكيد بشوفه على بداية السمتسر الياي .. اللي هو عقب شهر

شو بتكون ردة فعلي وردة فعله


الله يكون في عوني

jawaher said...

ملاك الله يوفقك ومالومك كلنا مرينا في هذي الظروف وصدقني هذي راح يكون اصعب قرار في حياتك

انت مالك الا الدعاء والاستخاره والله معاك وبتوفيق

ملاك هذي من اجمل ابيات نزار قباني اهداء لك عشان تروقين :

اي شيء في العيد اهدي اليك
ياملاكي وكل شيء لديك
اسوارا ام دملجا من نضار
لا احب القيود في معصميك
*************


بالتوفيق والسعاده دائما

ملاك في كلمات مافهمتها من البوست راح اسألك عنها انشاء الله بعد اختباري... يمكن يوم ازوركم في الامارات .... يعني ابغى اكتسب خبره :)

bin3li said...

السلام عليكم

أول شي شكرا على الـ
Tag
و لو أني ما بقدر أجاوب على الأسئلة ، ما
أدري ليش قلبي مب مجبل على موقعي هالفترة، في راسي أمور و مشاريع ثانية شاغلة بالي ألحين

المهم نرجع للموضوع هذا

ساعات الواحد تغلبه العاطفة وما يشوف أو يفكر إلا في لحظة الزواج و هي غير عن الحياة الزوجية إللي عادة نحن الشباب ما ننتبه لها

أحيانا الواحد في هالسن لما يشوف وحده ،خلاص يجزم أنها الزوجة المناسبة له و لا توجد أي خيارات أخرى

بس مع الوقت يبدأ يكتشف ،خصوصا لو ارتبطت في شخص آخر ، أنه الحياة مليئة بالخيارات
و لا يوجد خيار أوحد

في قصتج أنا ما لي حق أن أحكم على مدى نضج هالانسان لأني ما أعرفه، و مدى فشل أو نجاح هالنوع من الزواج

و لا أملك الحق في لومك أو تشجيعك على رفضه

و لكن أقدر أقول إن الحياة ملئية بالخيارات و الخبرات

أما بالنسبة لرأئي الشخصي في مثل هالمسائل

أعتقد أنه زواج ينقصه النضج عادة
أحيانا في شباب يبون يخطبون زميلاتهم في الدراسة عشان يطلعون و يسيرون و يجلسون مع بعض في المكتبة و ستاربكس و في سينما
و يجربون العلاقة في الجنس الآخر في إطار مقبول اجتماعيا

لكن هذا الأمر لا يضمن نجاح أو استمرار الحياة الزوجية
لأن الزواج ارتباط شخصين من خلفيتين مختلفتين ، تترتب عليها حقوق و واجبات

هذا رأئي :)

طائر بلا وطن said...

ملاك دبي
.......

قرار صعب .. و الاستخارة زين
:)

جواهر
......

كأن الابيات لايليا ابي ماضي

اللقافة شينة ادري

آسف
:p

jawaher said...

طائر : الابيات لنزار قباني وغناها ناظم الغزالي

وش دعوه لقافه ؟؟؟ حضورك دايما حلو ولقافتك احلا :P

Garmooosha said...

مرحبا الغالية
شكلي يايه وايد متأخر

أتمنى إنج فعلا إنهيتي هالموضوع حتى في عقلج الباطن

كأي بنت حلو إنها تحس بإنها مرغوب فيها وإنه في حد يفكر فيها
حلو من زميلج إنه قبل مايتقدم لأهلج إنه يعرف رأيج ومن خلال وسيط إلي هي الدكتورة
هذا مو غلط
لو حاول مباشرة يمكن أقول غلط بس طريقتة سليمه منعا للإحراج بدال ما إيي عند أهلج وينرفض يعرف قبل ما إيي أحسن

صدقيني الي مريتي فيه شي طبيعي ويدل إنج إنسانه بسيطة وقلبها طيب
تخافين على مشاعر الغير - هالشي الي لازم تقللين منه ، أقصد خافي على مشاعر الناس المقربين الي يعنولج شي فحياتج بس مب عالكل

وتمنياتي لج بفصل دراسي موفق ، وحياة سعيده ، وعريس غفلة يديد

لاحرمنا الله من جديدج

غريب said...

عزيزتي
أعتقد أن الخطوات ألى سويتيها غلط كان يجب مشاركة الأهل وبعدها السؤال عن الرجل وأخلاقه وبعد تجميع المعلومات تقومين بصلاة الأستخاره وبعدها تقررين الرفض أو القبول بس أنتي صديتيه بسبب الموقف بس أبي أذكرك ما من محبه ألا بعد عداوه عيدي أحساباتك في الخطيب الجاي والله أوفقك ولاتنسينا بالعزيمه علي الأقال أنباركلك
تحياتي

malak_dubai said...

جواهر

مشكوره حبيبتي على الابيات

وعن الكلمات .. انشاء الله متى ما بغيتي بعلمج

بس عاد يوم بتين الامارات لا تنسين تقولين لي ..

لازم نتشاوف ..



= = = = = = = =


بن علي

اول شيء احب اقولك .. انه فعلا افتقد وجودك

يقولون من طول الغيبات ياب الغنايم

وينك كل هالفتره ؟؟

ودر عنك هالدلع .. ورد اكتب في مدونتك

وليش انشاء الله ما تروم تجاوب على الاسئله .. والله ما يبالها شيء

بس كون في لحظه صدق واعتراف ويا نفسك


اما بخصوص عريس الغفله

انا أأيدك الرأي

اعتقد انه مجرد اعجاب .. ومثل ما قلت يريد يكون ويايه وجذه

وفعلا ترى الريال ما بيبن عليه مال مسؤوليه

وبالذات انه حاول اييب راسي قبل وانا سويت له طاف

معناته .. انا بس في راسه ويريد اييب راسي بأي طريقه

بس طبعا هالشيء ما بصير

ما ادري ليش .. انا من دخلت هالجامعه وانا قايله

اي شخص يخطبني من الجامعه ما بوافق

مب اني برفض .. بس اكيد عندي واااااااايد مقاييس للناس اللي ويايه في الجامعه

وبعدين مثل ما قلت .. الزواج يحتاج النضج

وما اعتقد اني انا نفسي وصلت هالمرحله ..

صح شليت مسؤوليات وايد كبيره وانا بعدني صغيره

بس بعدني دلوعة البيت اللي ما ينرد لي طلب

معقوله بقدر اكون زوجه مطيعه في هالعمر ؟!

صعبه وايد .. يبالي اودر هالدلع وخلاف افكر في الزواج


ع العموم .. مشكور على رايك .. وفعلا تراه وايد أثر فيه


= = = = = = = = =

طائر بلا وطن

القرار كان صعب .. بس الحمدالله خلصنا منه

الاستخاره زينه .. يوم الانسان يكون متردد

مب يوم يكون رافض رفض قطعي

مشكور ع النصيحه .. انشاء الله في المرات اليايه بستخير

= = = = = = = = =


قرموشه

لا حبيبتي مب متاخره .. وحياج في أي وقت

هيه الحمدالله حتى في عقلي الباطن انهيت الموضوع


صح انه يمكن ما حب اييب اهله وينرفض ..وحب يسأل قبل

بس مثل ما قلت لج .. يمكن كان الموضوع يأثر فيه نوعا ما

بس الرفض موجود في كلا الحالتين

الا اذا حد اثبت لي انه الاشياء اللي انا اعرفها عنه غلط


ما اقول ما جد صارت لي .. بس سبحان الله دايما كنت ارفض

ما ادري ليش ..

بقولج شيء .. انا احس اني هب مستعده للزواج حاليا

فـ سالفة انه حد ايي يرمسني وياخذ رايي .. اطلع مليون علثه واردهم

بس يوم السالفه بتكون عند اهلي.. ما اروم ارفض بدون اسباب مقنعه

ما ادري ليش الاهل ما ينتبهون اذا بنتهم فعلا كانت قد الزواج او لا


اتمني لي فصل دراسي موقف وحياة سعيده .. بس عرس يديد لا

بليييييييييز .. حاليا لا .. ما اريد امر باللي مريتبه مره ثانيه

ما مرت الايام بسهوله عليه .. وايد تعبت فيهن

حاليا ما اريد شيء يشغلني غير دراستي


تسلمين حبيبتي على وجودج ويايه .. ودايما كانت لج وقفات ما تنسى

= = = = = = = = = = =


غريب

لا مب غلط .. المفروض ما كنت تحكم انه غلط .. بما اني ما رمست عن الريال

انا من باب الستر ما رمست عنه .. صح حتى لو رمست انتوا ما بتعرفون منو هو

بس بعد .. ما احس انها حلوه اني ارمس


انا جد سامعه عن الريال .. ومستحيل اي بنت ترضى تاخذ واحد عليه هالسوالف


بصلي الاستخاره في حالة اذا كان الريال زين

وبخصوص اني المفروض كنت اخبر اهلي

فـ انا خبرت اختي العوده وامايه .. بس قبل لا ابدا في الموضوع قلتلهم اني رافضه

وانا قلتلهم من باب انه ما توصل لهم الرمسه من برع

موقفهم مب غير عن موقفي .. هم ما يعرفون اسبابي

بس شيء فوارق اجتماعيه خلتهم يرفضون الفكره


ع العموم .. خلاص الموضوع انتهى

واذا صار اي موضوع يديد .. انشاء الله بخبركم

Asmaa said...

أختي ملاك

القرار صعب

المرات الجايه لازم تستخيرين

ربي ماراح يتركك

صدقيني والله مجربه

وانشاء الله ربي يكتب لك الخير

في غيره

طائر بلا وطن said...

عاد تدرين اشلون يا جواهر

ايليا يعني ايليا

ويا حلاة اللقافة بعد
:p

i'm sure:)

جواهر تعجبيني لما تدعمين كلامج بالشعر
عندج قدرة عجيبة على الحفظ و توظيف الابيات

بس هالمرة الظاهر تأثير الامتحانات نساج اسم الشاعر

:p

salam

and sorry malak