Thursday, January 19, 2006

مواقف صغارية

وايد مواقف نسمعها من الصغاريه وانتم نضحك عليها .. معقوله يوم نحنا كنا صغار كنا شراتهم

بس صدق عليهم سوالف تضحك

اليوم بنت اخويه ترمس اخويه تقوله بابا نبى نسير امريكا
قالها ليش .. شو عندج هناك ؟؟
قالت له ابغي اسير مكان بااااااارد وفيه ثلج .. ابغي العب بالثلج
قالها تبين الثلج بنوديج امارات مول
قالت له ما ابغي امارات مول
قالها ليش
قالت له بس ابغي اسير امريكا
قالها ما شيء سيرة .. تبين ثلج بنوديج امارات مول
قالت له بابا انا افكر في مصلتحك
قالها كيف ؟؟
قالت له انته في امارات مول لازم تدفع بيزات عشان ندخل مكان الثلج
اما في امريكا الثلج موجود برع .. اي حد يروم يلعب به بدون بيزات

تم يضحك عليها .. قالها انزين ارقدي واحلمي في امريكا يمكن توصلين لها


صدق تفكير الصغاريه غريب .. عندهم اساليب غريبه للاقناع

من فتره بسيطه

ولد اخويه يقولي .. عمو بخبرج شيء
قلتله قول شو عندك
قالي 1 + 1 كم يساوي
استغربت من سخافة سؤاله .. قلتله اكيد 2
قالي لا .. جوابج غلط
قلتله ليش
قالي 1 + 1 يساوي 11

سبحان الله .. اول مره اكتشف هالشيء


والا اخوهم اللي اصغر منهم .. كل ما يشوفني لابسه عباتي .. يقولي وين بتسيرين
اقوله بسير الجامعه
يقولي انزين لا تتأخرين
تقولون ابويه هب ولد اخويه الصغير
اقوله انشاء الله يدي .. اي اوامر ثانيه بعد
يقولي .. ولا تسرعين
والا يقولي لا تخافين يوم بتطلعين .. لانه الله وياج .. الانسان المؤمن الله يكون وياه وين ما سار

استغرب من هالصغيروني .. ما شاء الله عليه .. رغم صغر سنه عنده معرفه واسعه


طفولتنا كانت غير .. كانت حلوه وبسيطه .. ما كانت فيها اشياء معقده شرات عيال الزمن

10 comments:

الغلا said...

الطفولة عالم ممتع

والفرد منا يتمنى لو عاد لمرحلة الطفولة ..مرحلة البرائة والتفكير البسيط

بصراحة بنت أخوج تفكيرها منطقي ليش يخسر والثلج في امريكا مجاني :)

وعجبني كلام ولد أخوج ما شاء الله عليه ليش نخاف دام الله معانا

دمتِ بود

MriM said...

لووول
يحليلهم والله ضحكوني ..

احب تفكير اليهال واحب اخذ افكارهم في الاشياء اللي اسويها , دايما يفكرون بأشياء مرات تكون احلى من اللي نفكر فيها نحن الكبار

=)

Q8ya said...

هههههههههههههههههههه

اما سالفة امريكا خطيرة هههههههههههههههههههههه

ظحكتني والله

الله يخليهم لكم ان شاء الله...:)

jawaher said...

لوووووووووووووول ........ مرره يجننون


الله يخليكم لبعض

3lo G said...

loo0oo0oo0ool,.,.,.,.,.,.,. n7n yom kna yhal kna cheee ?!?! mst7eeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeelll!

nirfana said...

الطفوله تثير فينا الدهشه حتى العمق

بارك الله فى جميع الاطفال

ورزق من حرم منهم

تحياتى

The Doctor !i.. said...

مشكورة أختي على هذا الموضوع الظريف وكل عام وإنت في حفظ الرحمن الرحيم وعيد مبارك على الجميع
أما بعد قد يكون 1+1 يساوي 11 فعل بل أكثر من 11 لو نظر إليه من جانب أنه بدر من طفل أيا كان عمره أي أنه فكر وهذا يعتبر دليل على التفكير البعيد برأيي وفعلا هذا الجزء أثار لدي بعض المواضيع التي قد لا تأتي بسهولة


ودمتي ... برعاية الرحمن

garmooosha said...

الله يحفظهم الصغارية
نعم هالوقت الصغار وايد نبيهين من عمر السنة وهم يفتكرون في كل إلي حواليهم

qalm-jaf said...

هههههههه
الله يخليم لكم
صج يوم كنا صغار الكبار على بالهم احنا ما نفهم بس الى الان اتذكر شنو كانو يقولون؟؟
.
.
.
على العموم الله يحفظهم

malak_dubai said...

الغلا

مثل ما كانت الطفوله بالنسبه لنا مرحله ودنا اليوم انه نرجع لها

العمر اللي نحنا فيه الحينه .. يوم بنكبر بنحن له وبنتمنى لو نرجع له

المفروض انه ما نضيع ولا دقيقه من حياتنا وتستمع فيها


الله دايما ويانا .. وين ما نكون .. بس المفروض انه نحنا ما نقصر فيه حقه


تسلمين الغاليه





= = = = = = = = =

mrim

تفكير اليهال دايما ما يكون فيه عفويه

حلو انج تاخذين منهم ..


مشكوره حبيبتي





= = = = = = = = =


q8ya


انشاء الله دوم تكونين مستانسه وتضحكين

الله يخليج لاهلج الغاليه





= = = = = = = = =



jawaher

الله يخليج لاهلج ولنا


تسملين الغاليه




= = = = = = = = =



nirfana

الله يسمع منج الغاليه .. الله يرزق كل اللي انحرموا من الصغاريه

والطفوله شيء جميل وممتع





= = = = = = = = =


The Doctor !i..


الله يبارك فيك اخويه .. وانشاء الله تكون سنه خير علينا

صح فعلا .. لو نفكر فيها .. انه هالياهل فكر انه يجمع الرقمين

ويخليهم حذال بعض .. فعلا تفكير يثير وايد تساؤلات


تسلم اخويه



= = = = = = = = =




قرموشه


صدقج والله .. هالجيل عليه سوالف غريبه

بس نطلع منهم اشياء زينه

الله يعينا على جيل عيالنا





= = = = = = = = =


قلم جاف

اممممممم .. شو كانوا يقولون ؟!


وفعلا الكبار وايد كانوا يستغفلونا يوم نحنا صغار

بس بعد كان هالشيء لصالحنا :)


اشكرك على تواجدك