Tuesday, January 31, 2006

احساس غريب

كنت أذرف دموعي حزنا على غربتي
اذرفها من مرارة الايام وقسوتها
من جروح لازمتني

لكن ما هو سبب حزني اليوم ؟!
لما ينتابني شعور بالغربه وانا في موطني
لما اشعر برغبة في البكاء

احساس غريب يتغلغل عظامي
احس ببرودة .. ارتعش منها
لا .. ليس خوفا
ولا حزنا

لما أشعر ان هناك كارثة تنتظرني
تقترب شيئا فـ شيئا
تستلذ بتوتر أعصابي

أي عاصفة تلك بـ انتظاري ؟!

لم أعد أقوى على المحاربة
ولم تعد أحصنتي قادرة على المقاومه

اريد الهروب
اريد ان اهرب من واقع مرير ينتظرني
اريد الهروب من نفسي
من ذاتي .. من تفكيري

تكاد تقتلني أفكاري
تأخذني إلى عالم يسوده الظلام
عالم مليئ بالاحزان
تقيدني فيه

كفاك .. أبتعدي عني
لم أعد أحتمل تلك الأفكار
ولا تلك الاحزان

Saturday, January 28, 2006

نتايج امتحاناتي


يوم استلام النتايج يوم يوتر
واللي يذبح زياده .. انه يكون عندي امتحان نفس اليوم
معناته استلم نتيجة الكورس اللي طاف وامتحن في الماده اللي انا مسجله فيها
الحمدالله نتايجي كانت زينه .. استانست وااااااااايد عليها
لو اني في البدايه تضايجت
كنت كله اقرا نتايجي غلط
بس عقب يلست على راحتي ادور الايدي مالي .. وخذت نتايجي
يالله عقبال البقيه ما يستلمون نتايجهم ويستانسون

Monday, January 23, 2006

أول يوم في الونتر + عريس الغفلة



يوم السبت .. أول يوم دراسي في فصل الونتر

كنت وايد مضايجه قبله بيوم .. مجرد احساس اني بداوم كل يوم .. كان يلوع لي بجبدي

عندي ماده وحده .. تبدا من 7 وتخلص 10 بالليل

وصلت الكليه وانا احاول اتقبل واقع اني خلاص بدا دوامي .. وخلصت الاجازه

في وقت البريك .. سرت عند دكتوره كانت تدرسني الكورس اللي طاف

دخلت عليها مكتبها

انا: السلام عليج دكتوره

الدكتوره: وعليكم السلام .. هلا ملاك حياج تفضلي

انا: شخبارج دكتوره

الدكتوره: الحمدالله بخير .. تعالي ملاك .. ابغي ارمسج في موضوع

انا: خير دكتوره .. عسى ما شر

الدكتوره: لا ما في شيء .. بس فلان يبى يخطبج .. واهله رمسوني يسالوني عنج .. انا قلت اللي شفته فيج

طبعا اكيد الدكتوره طاحت فيه مديح .. لانها وايد تحبني .. بس هذا من وين طلع لي بعد ما ادري .. قبل كمن شهر صار موقف بيني وبين هالانسان .. وصدق وايد غيضت عليه .. هذا اللي يشوفه يقول مستحيل يفكر في العرس

بـ اختصار .. بالنسبه لي كانت صدمه انه خطبني .. معقوله لهالدرجه انا أثرت فيه وخليته يفكر في الزواج

بحكم ما كنت سامعتنه عنه قبل فـ هالانسان ما يصلح لي ابدا

قلت للدكتوره: دكتوره انتي تعرفين رايي في هالانسان .. بليز انهي الموضوع من الحينه

الدكتوره: هيه بس يمكن تغير الحينه .. الريال يباج .. واهله واااايد متمسكين فيج .. بس يتريون تقولين هيه وسيده بيون يخطبونج رسمي

انا: دكتوره .. انا رافضه .. واهلي ما اظني يرضون

الدكتوره: لا تستعيلين وردي فكري عدل .. ورمسي اهلج

انا: انشاء الله يصير خير

وطلعت من عندها ورديت كلاسي .. مستحيل كنت اقدر اركز .. من وين طلع لي هذا الحينه .. وقته يعني


في قرارة نفسي انا رافضه .. بس ليش افكر في السالفه ما ادري .. شو الشيء اللي يخليني افكر

ما انكر انه كبر في عيني يوم انه قرر يخطبني بدال لا يلعب عليه .. وبالذات انسان شراته مستحيل يفكر في الزواج .. معقوله قدرت اغير رايه

ما ادري هذا حب من اول نظره او مجرد اعجاب

فكرت وفكرت وااااااااايد .. حتى ما اظلم هالانسان .. ما ادري بصراحه في شو كنت افكر .. بس كل اللي كنت اسويه اني اربط الاحداث من اول يوم رمسني في الكلاس لين اليوم

كنت احس من نظراته مرات بـ اعجاب .. بس معقوله يوصل للارتباط

لا.. لا مستحيل

اليوم بعد ما خذت نفس عميييييييق .. رمست اختي العوده .. وطبعا قبل لا اسمع رايها .. قلتلها اسمعي تراني رافضه

بس حبيت اقولكم .. عشان اذا وصلت لكم الرمسه من برع ما تنصدمون .. وانا باجر برد على الدكتوره وبقولها اني رافضه والموضوع منتهي بالنسبه لي


انا رفضت خلاص .. والموضوع منتهي

بس ما ادري ليش .. بعدني احس بتأنيب الضمير

هل فعلا انا يالسه اظلمه بهالقرار

I really don’t know what to do... it’s really hard to me to handle this all


But I know what I’m gona to do it.. is the right

Is it right??


ادري اني واااااااايد رمست .. بس كنت اريد اطلع اللي في خاطري .. بس بعدني احس بضيااااااااع كبير

اتمنى من كل قلبي انه رفضي له يكون آخر المطاف بيني وبينه

واتمنى فعلا انه ما يتمسك فيه اكثر .. لاني ما بعرف شو اسوي عقبه

Saturday, January 21, 2006

I've BeeN TaGGeD



لكل حصان كبوة ، متى كانت كبوتك ؟ وكيف تخلصت منها ونهضت مرة أخرى في حياتك ؟

كانت تقريبا قبل سنه ونص .. و وااااااايد عانيت منها .. بس الحمدالله اني قدرت ارد لحياتي الطبيعيه مره ثانيه .. ما اقدر احدد متى بالضبط .. بس اقدر اشوف اللي انجزته في الفتره البسيطه اللي طافت .. احس حزتها اني فعلا قدرت ارد لحياتي الطبيعيه



الحياة في نظرك ، سباق مع النفس أم سباق مع الآخرين ؟

الحياه سباق مع النفس قبل لا تكون مع الآخرين .. المفروض الانسان يثبت لنفسه كل شيء قبل لا يثبته للناس



يجد الإنسان أمامه الكثير من المستحيلات ، شيئا فشيئا يكتشف أنه حقق بعض من هذه المستحيلات ،هل يعني هذا أنه من الممكن جدا تحقيق بقية المستحيلات ؟

اكييييييد من الممكن .. انا ما عندي كلمة مستحيل في قاموسي .. كل شيء ممكن انه يتحقق بس يباله اراده وصبر



الفتاة اكثر اهتمام بالذوق والفن من الشاب . لماذا ؟ هل اهتمام الشاب بالفن والديكور ينتقص من رجولته

لا ابدا .. اهتمام الشاب بالديكور شيء وااااايد حلو .. ويدل على ذوقه العالي


يقول تعالى في سورة الكهف : (( وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا وَلا تُطِعْ مَنْ أَغْفَلْنَا قَلْبَهُ عَن ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا (، أين نجد معان هذه الآية في حياتك؟

في فتره من فترات حياتي .. احب احتفظبها لنفسي


خير متاع هذه الدنيا الزوجة الصالحة ، من هي الزوجة الصالحة في هذه الدنيا الآن ؟ وكيف يمكن ان يجدها من يريد ؟الزوج

الزوجه الصالحه هي اللي تسعى جاهده في ارضاء زوجها ولكن مب على حساب كرامتها .. وهي موجوده ويقدر اي انسان انه يلقاها .. بس لازم يدقن الاختيار .. وبعدين في مثل ينقال .. كل انسان يحصل على قد نيته


نريد مثال على احد المستحيلات التي استطعت تحقيقها في حياتك

كلمة ترددت واااااايد على مسمعي من عدة ناس .. كانت وايد تضايجني الرمسه اللي اسمعها .. بس الحمدالله بفضل الله قدرت اني اثبت لنفسي وللكل انه اللي انقال كان غلط .. واثبت لهم العكس
هم بالنسبه لهم كان مستحيل اني اسوي هالشيء .. وانا الحمدالله سويته


كل طراق بتعلومه هل تجد نفسك مقل أو مكثر بالطراقات التي تلقيتها من الحياة ؟

يا كثر ما تصفعنا من هالدنيا .. الحياه ابدا مب سهله .. مب مثل ما نحنا نتخيلها يوم نحنا صغار .. الحياه صعبه .. ويبالها تفكير وتخطيط .. وكل انسان يمر بتجارب .. وانا بعد مريت بوايد اشياء .. تاذيت من اشياء بس خذت منها العبره اللي بتفيدني في مشوار حياتي


نظرية الحياة الدنيا والأخرة ماهي بالنسبة لك ؟


نحنا نعيش حياتنا في الدنيا .. ولازم نعيشها وكأن نحنا عايشين فيها طول العمر
بس بعد لازم ما ننسى انه بتينا الآخر .. فلازم نعمل للآخره وكأن نحنا بنموت عقب ثواني


الأدب ، ماذا يعني لك ؟ وأين تجد نفسك فيه ؟ وماهو الأدب الذي يستهويك ؟

أحب القراءة .. وبالذات القصص .. ونفس الشيء احب اني اكتب قصص


ما هو اجمل انواع الفن الذي تحبه وتفضله وتستمتع به ؟

أحب الموسيقى الهاديه .. حلو جوها .. دايما ما يشعرني بالراحه


العقل يجد الفن غباء لا منتهي .. بينما النفس والروح والقلب يجدون الفن راحة ولذة ومتعة و وسيلة


دايما النفس والقلب تحب الاشياء اللي يرفضها العقل والمنطق



متى وجدت نفسك غير قادر على الصبر ؟

ولا مره الحمدالله


. Who would you TAG ?I would tag:

I want to tag:

rain drop

رحاااال

mrim

قرموشه

bin3li

Thursday, January 19, 2006

مواقف صغارية

وايد مواقف نسمعها من الصغاريه وانتم نضحك عليها .. معقوله يوم نحنا كنا صغار كنا شراتهم

بس صدق عليهم سوالف تضحك

اليوم بنت اخويه ترمس اخويه تقوله بابا نبى نسير امريكا
قالها ليش .. شو عندج هناك ؟؟
قالت له ابغي اسير مكان بااااااارد وفيه ثلج .. ابغي العب بالثلج
قالها تبين الثلج بنوديج امارات مول
قالت له ما ابغي امارات مول
قالها ليش
قالت له بس ابغي اسير امريكا
قالها ما شيء سيرة .. تبين ثلج بنوديج امارات مول
قالت له بابا انا افكر في مصلتحك
قالها كيف ؟؟
قالت له انته في امارات مول لازم تدفع بيزات عشان ندخل مكان الثلج
اما في امريكا الثلج موجود برع .. اي حد يروم يلعب به بدون بيزات

تم يضحك عليها .. قالها انزين ارقدي واحلمي في امريكا يمكن توصلين لها


صدق تفكير الصغاريه غريب .. عندهم اساليب غريبه للاقناع

من فتره بسيطه

ولد اخويه يقولي .. عمو بخبرج شيء
قلتله قول شو عندك
قالي 1 + 1 كم يساوي
استغربت من سخافة سؤاله .. قلتله اكيد 2
قالي لا .. جوابج غلط
قلتله ليش
قالي 1 + 1 يساوي 11

سبحان الله .. اول مره اكتشف هالشيء


والا اخوهم اللي اصغر منهم .. كل ما يشوفني لابسه عباتي .. يقولي وين بتسيرين
اقوله بسير الجامعه
يقولي انزين لا تتأخرين
تقولون ابويه هب ولد اخويه الصغير
اقوله انشاء الله يدي .. اي اوامر ثانيه بعد
يقولي .. ولا تسرعين
والا يقولي لا تخافين يوم بتطلعين .. لانه الله وياج .. الانسان المؤمن الله يكون وياه وين ما سار

استغرب من هالصغيروني .. ما شاء الله عليه .. رغم صغر سنه عنده معرفه واسعه


طفولتنا كانت غير .. كانت حلوه وبسيطه .. ما كانت فيها اشياء معقده شرات عيال الزمن

Saturday, January 14, 2006

مباركن عيدكم




السلام عليكم
مباركن عيدكم .. وعساكم من عوادة
ادري اني وايد متأخره ابارك .. آسفه بس مشاغل العيد كل حد يدريبها
والله العيد في البلاد غير .. مب برع البلاد النرسات يصبح عليه ويباركن لي
حلوه كانت ايام العيد .. فعلا استانست فيها .. لو مب قرصة السمسومه اللي لين الحينه اعاني منها

اتمنى فعلا انه الكل استمتع بالعيد
يالله انا بسوي شرات سلعوه
Stop للبوق
لين ما اخلص الفاينالز
الحمدالله انا خلصت 3 منهم قبل العيد
باقي لي 2 .. باجر وبالاحد الثاني
وعقبه بقدر شويه اتنفس براحه عقب اول كورس دراسي في الجامعه
وبعطيكم تقرير ملخص عن الاشياء اللي استفدتها من الجامعه ..وعن مواقف صارت لي
صح اجازتي مب طويلة .. لانه تاريخ 21 ابدا كورس الونتر
بس ما عليه بعرف كيف اقضي هالـ 5 ايام بـ متعه
لنا لقاء عقب يومين :)

Wednesday, January 04, 2006

وفاة سمو الشيخ مكتوم


بسم الله الرحمن الرحيم
يا ايتها النفس المطمئنه ارجعي الى ربك راضية مرضيه فادخلي في عبادي وادخلي جنتي
صدق الله العظيم

بقلوب مؤمنه وبقضاء الله وقدره اعزي نفسي وشعب الامارات بوفاة المغفور له سمو الشيخ مكتوم بن راشد آل مكتوم نائب رئيس الدولة رئيس مجلس الوزراء حاكم دبي
الله اغفر له وارحمه، وعافه واعف عنه، وأكرم نزله ووسع مدخله، واغسله بالماء والثلج والبرد، ونقه من الذنوب والخطايا كما ينقى الثوب الأبيض من الدنس اللهم جازه بالحسنات إحسانا وبالسيئات عفوا وغفرانا اللهم عامله بما أنت أهل له ولا تعامله لما نحن أهل له، فنحن أهل الذنوب والمعاصي وأنت أهل الرحمة والمغفرة.